KOB-ların gücləndirilməsi – Rəqəmsallaşma inqilabı biznes mənzərəsini yenidən formalaşdırır.

Bu gün sürətlə inkişaf edən və getdikcə rəqəmsallaşan dünyada kiçik və orta bizneslərin (KOB) rəqabətə davamlı olması və böyüməyə təkan verməsi üçün rəqəmsallaşma ən vacib alətlərdəndir. Bulud əsaslı həllərin qəbulundan tutmuş e-ticarət platformalarının tətbiqin qədər KOB-lar iş proseslərini sadələşdirmək, müştəri cəlbini artırmaq və yeni bazarlara açılmaq üçün rəqəmsal texnologiyalardan istifadə etməyə başlayır. Rəqəmsallaşmaya doğru bu gedişat təkcə KOB-ların fəaliyyətlərini dəyişdirmir, həm də innovasiya və böyümə üçün imkanlar dünyasının qapısını açır. Ölkəmizdə fəaliyyət göstərən kiçik və orta biznes sahibləri arasında aparılan araşdırmalardan birinin nəticələri göstərir ki, sahibkarlar üçün rəqəmsallaşma mühüm əhəmiyyət kəsb edir. Onların əksəriyyəti rəqəmsallaşma barədə məlumatlıdır və onun əhəmiyyətini anlayır, qəbul edir, dəyişən dünyaya ayaq uydurmaq və biznesini daha da inkişaf etdirmək üçün texnoloji alətlərdən istifadə etməyə hazırdır.